Прэзідэнт Францыі Эманюэль Макрон прыбывае ў Варшаву ў чацвер, 12 снежня, каб абмеркаваць план еўрапейскай міратворчай місіі, што захавае суверэнітэт Украіны. Пра гэта піша Rzeczpospolita (Rz).
Як піша польскае выданне, сутнасць французскай прапановы — міратворчая місія, якая гарантавала б, што Крэмль не парушыць магчымае спыненне агню і акрэсленую дэмаркацыйную лінію ў будучыні.
— Ёсць тры спосабы гарантаваць бяспеку Украіне. Першы — «нямецкі»: прыняцце краіны ў NATO нават без канчатковага акрэслівання яе межаў, як гэта было з Германіяй у 1955 годзе. Аднак Амерыка гэтага не хоча, ды і Германія таксама. Другі — «ізраільская» мадэль: масавыя пастаўкі зброі ва Украіну нават пасля заключэння міру. Гэта сумнеўна, улічваючы бюджэтныя цяжкасці як у ЗША, так і ў Еўропе. Трэці — «карэйская» мадэль: міжнародная міратворчая місія, якая ахоўвае дэмаркацыйную лінію паміж Паўднёвай і Паўночнай Карэяй больш за 70 гадоў. Менавіта на гэтай трэцяй мадэлі, з уключэннем элементаў першай і другой, будуць грунтавацца гарантыі бяспекі Кіева, — заявіў Rz Каміль Гранд, які раней займаў пасаду памочніка генеральнага сакратара NATO па абаронных інвестыцыях.
Выданне нагадвае, што яшчэ ў лютым Макрон упершыню прапанаваў ідэю адправіць замежныя войскі ва Украіну. 11 лістапада гэтае пытанне ён абмяркоўваў з прэм’ер-міністрам Вялікабрытаніі на сустрэчы ў Парыжы. З аналагічнай мэтай 27 лістапада Макрон звярнуўся да ўдзельнікаў саміту «васьмёркі» паўночных і балтыйскіх краін, якія сабраліся ў Гарпсундзе.
Элі Тэненбаўм, эксперт Французскага інстытута міжнародных адносін, які працуе над праектам такой місіі, растлумачыў Rz, што тая можа складацца з пяці брыгадаў (каля 40 тысяч салдат). Польшча магла б узяць на сябе камандаванне адной з іх.
Падчас сустрэчы ў панядзелак у Кіеве з лідарам ХДС/ХСС Фрыдрыхам Мерцам, які, імаверна, стане наступным канцлерам Германіі, прэзідэнт Украіны Уладзімір Зяленскі ўпершыню заявіў, што ў чаканні гарантый NATO такая міратворчая місія магла б гарантаваць бяспеку краіны, піша Rz.