Пасажырскі рэйс з Фенікса ў Окленд сутыкнуўся з рэдкім ваганнем самалёта, падобным да рухаў фігурыстаў. Ніхто не пацярпеў, але раней такія выпадкі прыводзілі да смяротных катастроф, піша РБК.
Самалёт Boeing 737 MAX 8 сутыкнуўся з эфектам «галандскага кроку», пасля чаго экіпаж вярнуў кіраванне над самалётам, а агляд пасля пасадкі выявіў пашкоджанне рэзервовага блока кіравання сілкаваннем, сказана ў справаздачы Федэральнага ўпраўлення грамадзянскай авіяцыі ЗША (FAA).
Інцыдэнт адбыўся 25 траўня прыкладна праз гадзіну пасля ўзлёту з Фенікса на вышыні 9,7 км, рэйс шчасна прызямліўся ў Оклендзе. Ніхто з 175 пасажыраў і шасці чальцоў экіпажа не пацярпеў.
Самалёт перадалі для праверкі і рамонту. Амаль два тыдні ён заставаўся ў Оклендзе, а 6 чэрвеня вылецеў у рамонтную майстэрню ў штаце Вашынгтон.
«Галандскі крок» — складанае ваганне самалёта па курсе і па нахіле, якое параўноўваюць з рухам галандскіх фігурыстаў. Гэта лічыцца сур’ёзным здарэннем, якое рабілася прычынай авіякатастроф са смяротным вынікам. Напрыклад, у 1985 годзе разбіўся рэйс Japan Air, які выконваў Boeing 747. Загінулі 520 чалавек, чацвёра пасажыраў выжылі.
«Гэта даволі рэдкая з’ява на сучасных самалётах, бо самалёт і яго сістэмы спраектаваныя так, каб перадухіліць нахіл у бок зямлі. І ўсё ж пілотам трэба ведаць, як рэагаваць, калі такое адбываецца», — расказаў пілот Boeing 777 і інструктар Florida Tech Шэм Малмквіст.
Boeing у апошнія месяцы сутыкаецца з пільным наглядам рэгулятараў праз шэраг здарэнняў з самалётамі. У студзені рэйсу Boeing 737 MAX, які выконваў рэйс Alaska Airlines, давялося экстранна прызямліцца праз тое, што ў яго на вышыні 5 км адвалілася дзверы люка аварыйнага выхаду. Пасля інцыдэнту гендырэктар Alaska Airlines Бэн Мінікучы паведаміў, што авіякампанія знайшла «некалькі незацягнутых нітаў» на «многіх» сваіх самалётах MAX 9. Нацыянальная рада ЗША па бяспецы на транспарце пачала расследаванне здарэння.
У красавіку ў Boeing 737−800 авіякампаніі Southwest Airlines адарвалася вечка рухавіка падчас узлёту і стукнулася аб закрылак, самалёт экстранна прызямліўся ў аэрапорце Дэнвера.
Кіраўнік адной з найбуйнейшых сусветных авіякампаній Emirates Цім Кларк у пачатку лютага заявтў, што стаў сведкам «прагрэсавальнага» зніжэння стандартаў Boeing, патлумачыўшы сітуацыю даўнімі памылкамі ў кіраванні і прыярытэтам фінансавых паказчыкаў над інжынернай дасканаласцю.