Расія плануе да 1 чэрвеня дадаткова мабілізаваць 300 тысяч чалавек. Пра гэта заявіў прэзідэнт Украіны Уладзімір Зяленскі, піша «Інтэрфакс-Украіна».
«Магу сказаць, што на 1 чэрвеня Расія рыхтуе мабілізацыю 300 тысяч дадатковых вайскоўцаў», — заявіў Зяленскі на прэс-канферэнцыі ў Кіеве.
Журналісты пацікавіліся ў Зяленскага, якая колькасць навабранцаў будзе мабілізаваная сёлета ва ўкраінскую армію.
«Што да асобнай колькасці людзей, якія будуць мабілізаваныя, не магу сказаць… Паўмільёна нам не трэба», — адказаў украінскі прэзідэнт.
Зяленскі падзякаваў за гэта галоўнакамандуючаму УСУ Аляксандру Сырскаму, адзначыўшы, што той знайшоў рэзервы ўнутры Узброеных сіл Украіны, дзякуючы чаму лічба была істотна зменшаная.
Нагадаем, напярэдадні Уладзімір Зяленскі падпісаў закон, згодна з якім ва Украіне зніжаны на два гады мінімальны прызыўны ўзрост — цяпер пад мабілізацыю падпадаюць мужчыны з 25 гадоў.
Тое, што ў РФ ужо летам могуць правесці дадатковы набор мабілізаваных, раней не выключалі расійскія эксперты. Яны звязвалі гэтую неабходнасць з заявай кіраўніка Мінабароны РФ, які расказаў пра планы сфармаваць «дзве агульнавайсковыя арміі і 30 злучэнняў».
