ЗША папярэдзілі Расію, што менавіта «Крокус Сіці Хол» можа стаць мішэнню тэрарыстаў, паведамляе The Washington Post (WP) са спасылкай на неназваных амерыканскіх чыноўнікаў. Дырэктар Службы замежнай разведкі Расіі Сяргей Нарышкін напярэдадні заявіў, што інфармацыя ад ЗША была «занадта агульнай» і не дазволіла вылічыць злачынцаў.
ЗША больш чым за два тыдні да нападу на «Крокус Сіці Хол», што адбыўся 22 сакавіка, перадалі Расіі інфармацыю пра тое, што канцэртная зала можа стаць патэнцыйнай мэтай тэрарыстаў.
Суразмоўцы WP сцвярджаюць, што Вашынгтон перадаў Маскве звесткі пра падрыхтоўку нападу за дзень да публікацыі амбасадай ЗША ў Расіі паведамлення пра магчымую пагрозу тэракту ў расійскай сталіцы. Папярэджанне апублікавалі на сайце амбасады ў ноч на 8 сакавіка, у ім у тым ліку адзначалася, што тэракт можа адбыцца падчас канцэрта.
«Гэта выклікае пытанні пра тое, чаму расійскія ўлады не прынялі больш строгіх захадаў для гарантавання бяспекі месца, дзе баевікі ўчынілі трагедыю, у выніку якой загінула больш за 140 чалавек, а будынак быў падпалены», — адзначае выданне.
WP таксама нагадвае, што падлетак Іслам Халілаў, які працаваў гардэробшчыкам у канцэртнай зале, дапамагаў людзям эвакуявацца з будынка ў тую ноч — у адным з інтэрв'ю ён паведаміў, што персанал быў папярэджаны пра магчымы тэракт.
Паводле адной з крыніц газеты, ЗША таксама папярэдзілі расійскія ўлады пра магчымую атаку на сінагогу ў Маскве. І 7 сакавіка ФСБ Расіі паведаміла, што перадухіліла тэракт у маскоўскай сінагозе, які рыхтаваўся баевікамі ячэйкі «Ісламскай дзяржавы» «Вілаят Харасан».
2 красавіка дырэктар Службы замежнай разведкі Расіі Сяргей Нарышкін заявіў, што ФСБ атрымала ад ЗША пэўную інфармацыю пра магчымасць тэракту ў Расіі, але яна была «занадта агульнай».
«Федэральная служба бяспекі атрымала пэўную інфармацыю з боку спецслужбаў Злучаных Штатаў Амерыкі пра тое, што такое, на жаль, магчыма. Але, як нашыя расійскія калегі казалі, інфармацыя была занадта агульнай і не дазволіла выявіць да канца тых, хто ўдзельнічаў у гэтым страшным злачынстве», — сказаў ён.
Нагадаем, увечары 22 сакавіка мужчыны, узброеныя аўтаматамі, уварваліся ў будынак буйнога канцэртна-выставачнага комплексу «Крокус Сіці Хол» у падмаскоўным Краснагорску (фактычна ўскраіна Масквы) перад пачаткам канцэрта гурта «Пікнік». Нападнікі пачалі страляць яшчэ ля ўваходу, потым вялі стральбу па наведніках унутры — як у фае, так і ў канцэртнай зале. Таксама яны ўчынілі падпалы — у комплексе пачаўся маштабны пажар, зала цалкам згарэла, у ёй абрынуўся дах. Паводле апошніх звестак, у выніку тэракту загінулі 144 чалавекі.