У сельскагаспадарчых угоддзях на востраве Вялікая Брэіла ў Румыніі знайшлі абломкі беспілотніка. Пра гэта са спасылкай на заяву Мінабароны краіны паведамляе «Еўрапейская праўда».
CNN Antena 3 сцвярджае, што абломкі знайшлі за 12 кіламетраў ад горада Брэіла. Падзенне дрона, паводле выдання, суправаджалася гучным гукам.
Пачуўшы гук, мясцовыя жыхары выйшлі са сваіх дамоў і патэлефанавалі ў надзвычайныя службы. Неўзабаве тэрыторыю ачапілі паліцыя і следчыя.
Паводле звестак крыніц выдання, гэта быў расійскі дрон, які мусіў атакаваць украінскія парты на Дунаі, і, хутчэй за ўсё, у яго адмовіла сістэма навядзення GPS.
Нагадаем, у ноч на 29 сакавіка Расія атакавала энергетычныя аб’екты Украіны. Усяго для нанясення ўдару расійская армія выкарыстала 99 сродкаў паветранай атакі, у тым ліку 60 ударных БПЛА тыпу Shahed-136/131, балістычныя ракеты «Кінжал» і «Іскандэр-М», авіяцыйныя ракеты Х-59, крылатыя ракеты «Іскандэр-К» і Х-101/Х-555. Былі пашкоджаныя цепла- і гідраэлектрастанцыі ў цэнтральнай і заходняй частцы краіны.