1 студзеня 2024 года непрызнаная Нагорна-Карабахская Рэспубліка (Арцах) канчаткова спыніла існаванне. Указ пра гэта быў падпісаны яе кіраўніком Самвелам Шахраманянам яшчэ ў верасні мінулага года.
Усе дзяржаўныя ўстановы і арганізацыі непрызнанай рэспублікі таксама распушчаныя.
Аўтаномная вобласць Нагорнага Карабаха была ўтвораная ў 1923 годзе з населенай пераважна армянамі часткі рэгіёна Азербайджана. У 1936-м перайменаваная ў Нагорна-Карабахскую аўтаномную вобласць (НКАВ), якая існавала ў складзе Азербайджанскай ССР (апошняя была часткай Савецкага Саюза).
Падчас Карабахскай вайны 1992−1994 гадоў рэгіён дэ-факта перайшоў пад кантроль непрызнанай Нагорна-Карабахскай Рэспублікі, якую міжнародная супольнасць пры гэтым прызнавала за Азербайджанам.
19 верасня 2023 года Азербайджан абвясціў пра правядзенне «антытэрарыстычных мерапрыемстваў лакальнага характару» ў Карабаху. Паводле звестак уладаў Карабаха, загінула не менш за 200 чалавек. Таксама загінула не менш за шэсць расійскіх міратворцаў. На наступны дзень улады Нагорнага Карабаху і Азербайджана дамовіліся пра спыненне агню. У непрызнанай рэспубліцы пагадзіліся скласці зброю. Пасля гэтага Нагорны Карабах пачалі масава пакідаць мясцовыя жыхары — яны скіроўваліся ў Арменію.
У снежні 2023 года Аляксандр Лукашэнка сустрэўся ў Санкт-Пецярбургу з прэзідэнтам Азербайджана Ільхамам Аліевым. Як паведамляла прэс-служба беларускага палітыка, «прэзідэнт Азербайджана пацвердзіў прапанову Беларусі ўзяць удзел у мадэрнізацыі і будаўніцтве інфраструктурных аб’ектаў у Карабаху». Прэс-служба прэзідэнта Азербайджана была больш лаканічнай, пра Карабах згадак не было.