Уначы 21 верасня Служба бяспекі Украіны і Ваенна-марскія сілы правялі спецаперацыю ў акупаваным Крыме, нанёсшы магутны ўдар па аэрадроме «Сакі», расказалі «Украінскай праўдзе» крыніцы ў спецслужбах.
Паводле звестак крыніц, спецслужбы выкарыстоўвалі беспілотнікі, якія перагрузілі расійскую СПА, а потым запусцілі ракеты «Няптун».
На аэрадроме было не менш за 12 баявых самалётаў, у прыватнасці Су-24 і Су-30, а таксама ПЗРК «Панцыр». Тамсама знаходзілася база падрыхтоўкі аператараў БПЛА Mojaher. Гэтыя беспілотнікі расіяне выкарыстоўваюць для каардынацыі ўласных паветраных атак, а таксама як баявыя ўдарныя дроны.
У спецслужбе таксама заявілі, што ўдары Службы бяспекі і Ваенна-марскіх сіл трапілі ў цэль і нанеслі сур’ёзныя пашкоджанні расійскай тэхніцы.
У сваю чаргу ў Мінабароны РФ заявілі, што ў ноч на 21 верасня была «спыненая спроба кіеўскага рэжыму здзейсніць тэрарыстычную атаку беспілотнымі лётнымі апаратамі самалётнага тыпу па аб’ектах на тэрыторыі Расійскай Федэрацыі».
«Сродкамі супрацьпаветранай абароны знішчана над акваторыяй Чорнага мора і тэрыторыяй Рэспублікі Крым 19 украінскіх БПЛА, над тэрыторыямі Курскай, Белгародскай і Арлоўскай абласцей — па адным», — гаворыцца ў паведамленні ведамства.