Ракета, якая ўпала на рынак ва ўкраінскай Канстанцінаўцы, прыляцела з тэрыторыі, што кантралюецца Украінай, лічыць каманда OSINT-даследчыкаў Conflict Intelligence Team і ваенны аглядальнік Bild Юліян Ропке. Як піша «Агенцтва», такія высновы яны зрабілі на аснове відэа, якое напярэдадні апублікаваў Уладзімір Зяленскі ў сваім тэлеграм-канале.
Першым свае высновы апублікаваў ваенны аглядальнік Bild Юліян Ропке. На апублікаваным Зяленскім відэа людзі паварочваюцца ў бок ракеты ў палёце. Акрамя таго, ракета адлюстроўваецца ў кузавах машын, што стаяць на рынку. Улічваючы размяшчэнне камеры, ракета ляцела з паўночнага захаду, дзе знаходзяцца падкантрольная Украіне тэрыторыі, піша журналіст. Пры гэтым ён асабліва падкрэслівае, што не будзе рабіць выснову пра тое, каму належыць ракета, бо абодва бакі выкарыстоўваюць такую зброю.
I did not want to go into this again, but as some analysts and journalists had to turn into activists again and throw sh*t on my yesterday #NewsMap (and me personally), I worked on the #Kostyantynivka attack again.
➡️ Fact-based findings: A subsonic object crashed into the… pic.twitter.com/KnNUpl5l0M
— Julian Röpcke🇺 (@JulianRoepcke) September 7, 2023
Заснавальнік CIT Руслан Левіеў у зводцы на YouTube-канале Майкла Накі таксама расказаў, што ракета прыляцела з паўночнага захаду. Свае высновы ён робіць грунтуючыся на тых самых сведчаннях, што і Ропке: мінакі паварочваюцца ў бок ракеты за імгненні да падзення, а ў карпусах машын відаць яе адлюстраванне. Акрамя таго, Левіеў нагадаў, што найбліжэйшыя да Канстанцінаўкі расійскія пазіцыі на поўначы Украіны размешчаныя прыкладна за 250 км — гэта Белгародская вобласць. Версію пра ўдар адтуль Левіеў лічыць малаімавернай. Таму эксперт прыходзіць да высновы, што ракета, хутчэй за ўсё, была ўкраінскай. Ён падкрэсліў, што ў CIT лічаць гэта выпадковасцю.
Версія пра тое, што на Канстанцінаўку ўпала менавіта ўкраінская ракета, яшчэ з учорашняга дня актыўна распаўсюджваецца па прарасійскіх тэлеграм-каналах. Украіна абвінаваціла ў тым, што адбылося, расійскі бок.
Рынак у Канстанцінаўцы быў абстраляны ўдзень 6 верасня. Загінулі 16 чалавек, 33 атрымалі раненні. Былі пашкоджаныя больш чым 20 гандлёвых пунктаў. У паліцыі Данецкай вобласці паведамілі, што ёсць некалькі версій адносна тыпу ўзбраення, якім быў нанесены ўдар. Дакладная інфармацыя будзе апублікаваная пасля правядзення экспертызы.