Прэзідэнт Расіі Уладзімір Пуцін сустракаўся з Яўгенам Прыгожыным 29 чэрвеня. Сустрэча доўжылася каля трох гадзін. Пра гэта журналістам расказаў афіцыйны прадстаўнік Крамля Дзмітрый Пяскоў.
Паводле Пяскова, сустрэча прайшла ў Крамлі праз пяць дзён пасля мяцяжу. Сустрэча доўжылася каля 3 гадзін, у ёй таксама ўдзельнічалі камандзіры атрадаў ПВК — агулам 35 чалавек.
Пяскоў адзначыў, што падрабязнасці гэтай сустрэчы невядомыя.
— Адзінае, што мы можам сказаць, — тое, што прэзідэнт даў ацэнку дзеянняў кампаніі на фронце падчас СВА, а таксама даў сваю ацэнку падзей 24 чэрвеня. Пуцін выслухаў тлумачэнні камандзіраў і прапанаваў ім далейшыя варыянты працаўладкавання і далейшага працоўнага прымянення, — цытуе Пяскова РІА «Новости».
Пяскоў таксама заявіў, што прадстаўнікі ПВК «акцэнтавалі, што з’яўляюцца перакананымі прыхільнікамі і салдатамі кіраўніка дзяржавы і вярхоўнага галоўнакамандуючага».
Раней пра сустрэчу Пуціна і Прыгожына пісала французская газета Liberation са спасылкай на крыніцы ў заходняй разведцы.
Нагадаем, кіраўнік ПВК Вагнера Прыгожын 23 чэрвеня абвясціў пра «марш справядлівасці» на Маскву ў адказ на ўдар Мінабароны Расіі па «тылавых лагерах» ягоных байцоў. Раніцай 24 чэрвеня Прыгожын паведаміў, што яго байцы кантралююць вайсковыя аб’екты ў Растове-на-Доне. Прэзідэнт Расіі Уладзімір Пуцін выступіў са зваротам, у якім назваў тое, што адбываецца, здрадай. Мяцеж завяршыўся тым, што Яўген Прыгожын адмовіўся ад «паходу на Маскву» і пагадзіўся з’ехаць у Беларусь. Крымінальная справа па мяцяжы Прыгожына была спыненая 27 чэрвеня, яму таксама вярнулі ўсе канфіскаваныя падчас ператрусаў грошы, каштоўнасці і зброю.
Расійскія СМІ некалькі разоў пасля гэтага паведамлялі, што Яўген Прыгожын прылятаў у Маскву і Санкт-Пецярбург.
— Што з ім будзе далей? Ну, усякае ў жыцці бывае. Але калі вы думаеце, што Пуцін такі шкадлівы і злапамятны, што яго заўтра «замочаць»… Не, гэтага не будзе, — заявіў 6 ліпеня Аляксандр Лукашэнка.
