Украінская армія прызнала, што яе войскі выведзеныя з Салядара. Пра гэта паведамляе France24 са спасылкай на спікера Усходняй групоўкі войскаў УСУ Сяргея Чараватага.
«Пасля месяцаў лютых баёў, у тым ліку цягам апошніх тыдняў, Узброеныя сілы Украіны пакінулі [Салядар] і адступілі на ўскраіны на загадзя падрыхтаваныя пазіцыі», — заявіў Сяргей Чараваты. Ён адмовіўся сказаць, калі менавіта адбылося адступленне.
У каментары «Суспільному» Чараваты расказаў, што рашэнне выйсці з Салядара было прынятае «для захавання жыццяў асабовага складу». Войскі адышлі на загадзя падрыхтаваныя рубяжы пасля выканання пастаўленай ім задачы: не далі расійскім войскам прарвацца на Данецкім напрамку і знясілілі расійскія сілы.
«Аднак лінія фронту была выраўнаваная: ні акружэння, ні ўзяцця ў палон (нашых войскаў) не было. Мы не можам сабе дазволіць такую раскошу, якую дазваляе наш вораг, проста кідаць байцоў на забой. Стараемся манеўраваць, біць агнём, выкарыстоўваць тактыку малых груп, каб максімальна знясіліць ворага», — дадаў прадстаўнік Генштаба УСУ.
Раней разведка Вялікабрытаніі паведамляла, што сілы УСУ, хутчэй за ўсё, былі выведзеныя з Салядара да канца 16 студзеня. Там адзначалі, што горад перайшоў пад кантроль ПВК Вагнера, а ўкраінскія сілы, імаверна, усталявалі новыя абарончыя рубяжы ў ваколіцах Бахмута.
Жорсткія баі за Салядар ішлі са жніўня 2022 года. Пра поўны захоп горада Міністэрства абароны Расіі заявіла 13 студзеня. Аднак ва Украіне гэта абверглі.
Украінскі бок заяўляў, што расіяне кідаюць на штурм горада велізарныя чалавечыя рэсурсы. Як адзначала намесніца міністра абароны Ганна Маляр, подступы да горада фактычна засеяныя целамі забітых расійскіх вайскоўцаў, але расіяне працягваюць наступаць «проста па целах сваіх загінулых байцоў».
