Жыхарка горада Клінцы Бранскай вобласці Расіі зняла на відэа наступствы ўдару ракеты па мясцовай базе ваеннай тэхнікі 13 снежня. Ролік разышоўся па сеціве. Жанчыну затрымалі, ёй давялося прасіць прабачэння за свой учынак на камеру сілавікоў. «Пакаяльнае» відэа з ёй з’явілася ў тэлеграм-канале «Подслушано Клинцы», увагу на гэта звярнула расійскае выданне «7×7».
«Здымала, не падумаўшы, на эмоцыях, каб паказаць сваім родным, наколькі блізка падышоў да нас наш вораг. Цалкам усведамляю сваю дурную памылку, прыношу прабачэнні вайсковай частцы, больш такога не паўторыцца. І звяртаюся да ўсіх людзей — не выкладвайце такія відэа і фота, па іх вораг можа зразумець сваю памылку і скарэктаваць удар», — кажа жанчына.
Як дадалі ў канале «Подслушано Клинцы», у дачыненні да гараджанкі «прымаецца рашэнне аб завядзенні крымінальнай справы».
Нагадаем, кіраўнік Бранскай вобласці спачатку паведаміў, што падчас атакі УСУ ў ноч на 13 снежня ракету збіла сістэма СПА, і абломкі ўпалі ў прамзоне. Аднак пазней з’явілася відэа (як цяпер стала зразумела, знятае затрыманай жанчынай), на якім бачныя наступствы абстрэлу — пашкоджаная тэхніка і велізарная варонка на тэрыторыі вайсковай часткі.
