Падчас адпачынку на лецішчы ля Заходняй Дзвіны маладая сям’я з Віцебска натыкнулася на гадзюку. На абарону гаспадароў кінуўся іх хатні кот, піша Fishingby.com.
Інцыдэнт адбыўся 11 сакавіка на ўскраіне горада. Віктар і Таццяна, завяршыўшы вясновыя справы на лецішчы, вырашылі прагуляцца да ракі разам са сваім катом Кашандрыкам. У нейкі момант жывёліна кінулася пад ногі гаспадыні, што ішла наперадзе, і кулём пакацілася ўніз па пясчаным схіле. Спачатку муж і жонка збянтэжыліся ад такіх паводзінаў свайго гадаванца, але ўжо праз некалькі секунд Віктар зразумеў, у чым рэч, і кінуўся ўслед за катом.
Кашандрык атакаваў змяю, якая там стаілася, і тым самым выратаваў сваю гаспадыню ад магчымага атрутнага ўкусу, але пацярпеў сам.
Нават ужо ўкушаны, кот не адыходзіў ад змяі ўнізе схілу, тым самым пазбаўляючы яе магчымасці манеўру, пакуль яго не забраў Віктар. На лецішчы Кашандрык адмовіўся ад любімага прысмаку і пайшоў спаць на свой пуфік, а перад ад’ездам Таццяна заўважыла, што з катом нешта не так — на шчацэ жывёліны ўтварылася даволі вялікая гематома. Гаспадыня патэлефанавала сваёй сяброўцы з ветэрынарнай клінікі.
«Змейка была зусім невялікай, муж сказаў, што гэта гадзюка. Сяброўка мае найгоршыя асцярогі пацвердзіла, але супакоіла тым, што каты даволі лёгка пераносяць укусы атрутных змей і нашаму гадаванцу нічога не пагражае. Уяўляеце! Ён жа быў гатовы ахвяраваць сабой дзеля мяне», — з захапленнем расказала Таццяна.
Каб не турбаваць хатняга гадаванца, з’язджаць з лецішча пара не стала. Раніцай Віктар вырашыў адвезці ката ў ветэрынарную клініку.
Нагадаем, у Беларусі жыве ўсяго тры віды змей: гадзюка звычайная, вуж звычайны і мядзянка. З іх толькі гадзюка адносіцца да атрутных. Больш за ўсё гадзюк жыве ў багністых месцах Віцебскай, Брэсцкай і Гомельскай абласцей.