Студэнтка Гродзенскага медыцынскага ўніверсітэта Алеся расказала ў TikTok пра сістэму платных адпрацовак прапушчаных заняткаў, якая дзейнічае ў яе ВНУ. Дадатковыя заняткі (і іх аплата) могуць паўтарацца бясконца, пакуль выкладчыкі не палічаць адказ студэнта дастаткова кампетэнтным — і не паставяць добрую адзнаку. Дзяўчына лічыць, што сутыкнулася з перадузятым стаўленнем супрацоўнікаў кафедры, якія не былі задаволеныя яе ведамі нават пасля чацвёртай спробы.
Алеся вучыцца на пятым курсе ГрДМУ. У сваім Instagram яна адзначыла, што яе спецыяльнасць — педыятрыя. Дзяўчына расказала, што прапусціла тры дні заняткаў праз хваробу. Гэта лічыцца паважлівай прычынай. Згодна з правіламі ВНУ, такія заняткі можна было бясплатна адпрацаваць цягам месяца. Па заканчэнні месяца «паважлівыя», але не адпрацаваныя пропускі пачынаюць лічыцца «непаважлівымі», і іх трэба адпрацоўваць платна.
Кошт такіх адпрацовак на сайце ўніверсітэта не пазначаны. Са словаў студэнткі, за два пропускі ёй трэба заплаціць 144 рублі. Згодна з правіламі, студэнт спачатку плаціць за «адпрацоўку», потым прыходзіць на дадатковы занятак і атрымлівае за яго адзнаку. Калі адзнака будзе нізкай — усё нанова. Трэба будзе зноў заплаціць, прыйсці яшчэ раз, атрымаць адзнаку — і так пакуль не атрымаеш хаця б чатыры балы з дзесяці.
«Навучальны занятак (у тым ліку лекцыя) лічыцца адпрацаваным толькі пры атрыманні студэнтам станоўчай адзнакі. У выпадку атрымання адзнакі, ніжэйшай за чатыры балы, студэнт мусіць звярнуцца ў дэканат для атрымання новага допуску пасля паўторнай аплаты прапушчанага навучальнага занятку», — гаворыцца ў правілах універсітэта.
Спрабаваць можна раз на тыдзень. Алеся кажа, што ёй трэба было адпрацаваць заняткі на кафедры анкалогіі. Паводле студэнткі, яна хадзіла на ўсе даступныя «адпрацоўкі» — тры разы, але толькі раз яе адказ палічылі дастаткова добрым. На відэа яна расказвае пра чацвёртую спробу.
— Я прыйшла падрыхтаваная, паводле сваёй асабістай ацэнкі, дастаткова для таго, каб атрымаць станоўчую адзнаку, — расказала дзяўчына. — Апытанне пачалося вусна. Выкладчык не быў задаволены маімі адказамі, а я не была задаволеная ацэнкай выкладчыка і пытаннямі, якія задаваліся мне. Я пачала задаваць навадныя пытанні наконт таго, дзе я магу прачытаць канкрэтна гэтую інфармацыю, каб мне паказалі ў кнізе. Бо на сайце кафедры ў кнізе выкладчыка, у якога я вучылася, гэтай інфармацыі не было.
Выкладчык прапанаваў студэнтцы вывучаць кнігі, а пасля запрасіў свайго калегу. Але да разумення прыйсці не ўдалося. Пасля званка ў дэканат студэнтцы прапанавалі адказаць на пытанні пісьмова. Паводле словаў дзяўчыны, яна дала досыць аб’ёмныя адказы:
— Абодва аркушы А4 былі мною распісаныя. Адно пытанне ў другой тэме было распісанае мінімальна. Аднак усяго астатняга было там дастаткова. На маю асабістую думку, я годна адказала на гэтыя пытанні. І ўзровень гэтых адказаў мусіць адпавядаць мінімальнай адзнацы.
Але выкладчыкі ўсё роўна засталіся незадаволеныя. Дзяўчына пачала ўдакладняць, чаму ёй задалі пытанні, якія не адпавядаюць тэме прапушчаных заняткаў (згодна з правіламі, тэма павінная супадаць). Паводле Алесі, яна атрымала адказ, што гэта экзаменацыйныя пытанні і гэтыя матэрыялы ёй таксама трэба ведаць, каб быць гатовай да экзамену. Пасля з’явіўся трэці супрацоўнік універсітэта. Студэнтка скардзіцца, што на яе пачалі павышаць голас і паводзіцца некарэктна. Лісты з адказамі забралі, адзнаку паставілі нездавальняючую, адпрацоўку не залічылі.
— На гэты момант я пастаўленая ў сітуацыю, у якой я вымушаная буду выплачваць суму 144 рублі штотыдзень, пакуль мая адпрацоўка не будзе залічаная, — тлумачыць сітуацыю студэнтка. — Калі адпрацоўка не будзе ў выніку залічаная, я не буду дапушчаная да сесіі і, адпаведна, буду адлічаная.
Алеся прапанавала гледачам відэа задумацца пра тое, ці хочуць яны паступаць у медуніверсітэт: «Ці вартая гэтая гульня свечак?»
— Прайшла ўжо больш чым гадзіна з таго часу, як я вярнулася з адпрацоўкі. Толькі цяпер я перастала плакаць. Некалькі разоў мяне ўжо ванітавала на нервовай глебе. Галава ў мяне проста ходзіць кругам ад гэтага стрэсу, які я перажыла, — апісвае свой стан дзяўчына. — Я не буду апісваць у фарбах, што менавіта і як менавіта казалі выкладчыкі. Але я магу сказаць адназначна: калі я давучылася на гэты момант да сярэдзіны пятага курса, я лічу, што гэта можа казаць пра тое, што я здольная падрыхтавацца да адпрацоўкі занятку. Не адпрацаваць занятак з чацвёртай спробы… Рэч ужо не можа быць толькі ў маіх кепскіх ведах, на думку выкладчыкаў. На маю суб’ектыўную думку, гэта пэўная спроба вымагання грошай з улікам таго, што сума можа вырасці да бязмежна вялікіх памераў.
Глядзіце таксама
