Праваабаронцам стала вядома пра пераслед сілавікамі супрацоўнікаў ААТ «Беларускае оптыка-механічнае аб’яднанне» (БелОМА) і ААТ «Пеленг». Паведамляецца пра выпадкі адміністрацыйных арыштаў і звальненняў, расказалі ў праваабарончым цэнтры «Вясна».
«Людзей правяраюць на паліграфе, праглядаюць іх тэлефоны, а таксама выклікаюць на „размовы“. Вядома пра выпадкі, калі людзей адпраўлялі на „суткі“ і звальнялі», — расказалі праваабаронцы.
У «Вясне» адзначылі, што «БелОМА» і «Пеленг» знаходзяцца пад міжнароднымі санкцыямі. Аб’яднанне беларускіх сілавікоў BELPOL расказвала, як гэтыя прадпрыемствы абыходзяць санкцыі, а таксама зарабляюць на вайне ва Украіне, пастаўляючы Расіі ваенныя камплектавальнікі і дэталі.
Нагадаем, «Пеленг» і холдынг «БелОМА» ўваходзяць у Дзяржкамваенпрам — аб’яднанне прадпрыемстваў вайскова-прамысловага комплексу Беларусі. На «Пеленгу» вырабляюць, напрыклад, прыцэльныя комплексы для бранятанкавай тэхнікі, а «БелОМА» робіць, у прыватнасці, прыцэлы для стралковай зброі і мінамётаў.