Жыхарка Шклоўскага раёна Таццяна пагадзілася дапамагчы знаёмаму і пазычыла машыну — і ўжо 9 гадоў плаціць пацярпелым у аварыі, у якую той патрапіў. Жанчына распавядае ў тыктоку пра тое, колькі можа каштаваць дабрыня і наіўнасць. Увагу на відэа звянула «Наша Ніва».
@tanyastabrand Но я все павно продолжаю дить и радоваться простым вещам. У вас прошу делать репосты этого видео и моих цветочков 🙂🙏
У 2015 годзе знаёмы папрасіў у Таццяны (яна жыве ў вёсцы Фашчаўка Шклоўскага раёна і вядзе тыкток пад нікам Tanya-sta-brand) пазычыць яму машыну. Тая не бачыла прычын не дапамагчы і спакойна аддала ключы. Праз некаторы час жанчыне патэлефанаваў іншы знаёмы і сказаў, што бачыў яе аўтамабіль на трасе ў аварыі.
Таццяна паспрабавала звязацца з сябрам, каму дала машыну, але не змагла датэлефанавацца. Але пакуль не было ніякіх афіцыйных паведамленняў ад ДАІ, жанчына была адносна спакойная. Толькі праз тры дні яна даведалася, што знаёмы знаходзіцца ў бальніцы:
— Выехаў на сустрэчную паласу, не завяршыў манеўр — і ўсё, — распавяла блогерка ў адным з відэа.
Пацярпелі людзі, якія былі і ў іншай машыне. Яны таксама патрапілі ў бальніцу. На шчасце, усе засталіся жывыя. Але цалкам зразумела, што пацярпелыя захацелі матэрыяльную кампенсацыю і звярнуліся ў суд.
— А ведаеце, у чым была мая галоўная памылка? Вінаваты ў аварыі мне казаў не ездзіць на першыя суды: «Ты ж не вінаватая, табе там рабіць няма чаго. Табе ўсё роўна нічога не зробяць». Як аказалася, чалавек быў пярэваратнем. Мне нельга было ездзіць на суды, паводле яго слоў, каб я там нічога лішняга не ляпнула!
Калі Таццяна нарэшце апынулася ў судзе і даведалася, што ўсю суму павінна выплачваць яна як уласніца машыны, то расплакалася. Сума была даволі вялікая — каля 650 мільёнаў рублёў (гэта было да дэнамінацыі, то-бок цяпер у гэтай сумы трэба адкінуць чатыры нулі).
— А вінаваты сказаў: «Усё, сябры, пакуль. Я вас больш не ведаю». Але больш балюча было, калі на судзе нявестка пацярпелага боку ўстала і сказала суддзі: «Вось, Таццяна Валер’еўна ў нас нават не папрасіла прабачэння». Я да гэтага часу не разумею, за што павінна была прасіць прабачэння.
З дапамогай адваката Таццяна спрабавала зменшыць суму выплат, але кажа, што той не змог скінуць ні рубля. Ужо 9 гадоў яна выплачвае кампенсацыю — цяпер засталося аддаць 57 тысяч рублёў.
— А вінаваты ў аварыі адсядзеў тры гады на хіміі — і ўсё.
Таццяна расказвае, што праз стрэс набрала 30 кілаграм. Кажа, што адзін час у яе быў такі неўроз, што яна ледзь не трапіла ў псіхіятрычную бальніцу.
У жыцці блогеркі не першы год шмат абмежаванняў. Канечне, яна вымушана скарачаць выдаткі.
— У мяне абмежаванне на выезд з краіны, усе карткі заблакаваныя, з любой працы будзе вылічвацца 50% заробку. Ніколі б не падумала, што не змагу больш выехаць не толькі ў Турцыю, але нават у Расію. Але ведаеце, я паглядзела, што ў нас у Беларусі прырода не горш. У нас вельмі прыгожыя азёры, рака Дняпро. А яшчэ ў нас у Бялыніцкім раёне ёсць вельмі клёвае возера. Ну не Мальдывы, канечне, але даволі чыста, там домікі стаяць. Проста шыкардос!
Таццяна зарабляе тым, што прадае на рынку кампазіцыі са штучных кветак, якія робіць сама. Пытанне пра тое, чаму муж не дапаможа закрыць доўг, жанчыну крыху злуе:
— Цяпер сума доўгу — 57 тысяч рублёў. Скажыце мне, дзе ў Беларусі вашы мужчыны столькі зарабляюць?
Яна падкрэслівае, што сям'і трэба не толькі закрываць доўг, але і гадаваць дзіцё, набываць жыллё.
Але жанчына не губляе аптымізму:
— Калі-небудзь я вылезу з гэтага доўгу і буду проста шчаслівым чалавекам. Ну, а пакуль змагаюся, жыву.