Следчы камітэт завяршыў расследаванне крымінальнай справы ў дачыненні да 63-гадовай жыхаркі Брэста. Яе абвінавацілі ў «спрыянні экстрэмісцкай дзейнасці» за тое, што яна пераводзіла грошы палітвязням у СІЗА. Пра гэта паведамляе прэс-служба СК.
У ведамстве заявілі, што да выхаду на пенсію жанчына ў поле зроку сілавікоў не трапляла. Працавала ў адной з вышэйшых навучальных установаў Мінска намесніцай дырэктара па выхаваўчай рабоце, мела станоўчыя характарыстыкі. Але ў 2021 годзе яе асудзілі на 1,5 года «хатняй хіміі» за «абразы на адрас прадстаўнікоў улады».
Сілавікоў таксама зацікавіла тое, што жанчына «ледзь не штодня яна дасылала розныя сумы на рахункі грамадзян, якія ўтрымліваюцца ў следчых ізалятарах».
У ведамстве абурыліся тым, што яна рабіла пераводы «выключна асобам, якія ўчынілі злачынствы экстрэмісцкай скіраванасці» — то-бок палітвязням.
«Прасцей кажучы, спачувала і дапамагала тым, хто займаўся падрыўной дзейнасцю ў дачыненні да Беларусі, удзельнічаў у масавых беспарадках, граміў гарадскую інфраструктуру, выкарыстоўваў гвалт у дачыненні да праваахоўнікаў, публікаваў іх асабістыя звесткі ў сетцы Інтэрнэт», — заявілі ў СК.
Усяго жыхарка Брэста зрабіла не менш за 125 паштовых грашовых пералічэнняў на адрас не менш чым 114 асобаў на суму больш за 1,5 тысячы рублёў.
Ёй выставілі абвінавачанне па ч. 1 арт.361−4 (Спрыянне экстрэмісцкай дзейнасці) КК Беларусі. Жанчына знаходзіцца ў СІЗА. Ёй пагражае да шасці гадоў пазбаўлення волі. Расследаванне крымінальнай справы завершанае, матэрыялы перададзеныя пракурору для скіравання ў суд.
Адзначым, што згодна з заканадаўствам Беларусі, грашовыя пераводы асобам, якія ўтрымліваюцца пад вартай ці адбываюць тэрмін, дазволеныя — незалежна ад таго, «палітычныя» яны ці «крымінальнікі».