Палякі больш за ўсё сімпатызуюць амерыканцам і італьянцам, а вось расіян недалюбліваюць, сведчаць вынікі апытання, якія апублікаваў польскі Цэнтр грамадскай думкі.
У топе сімпатый палякаў — таксама чэхі, славакі, англічане, літоўцы, фіны, венгры і французы. Грузінам, украінцам і немцам сімпатызуюць 40% апытаных грамадзян Польшчы.
У самым нізе табліцы размясціліся расіяне. Да іх станоўча паставіліся толькі 8% удзельнікаў даследавання. На радок вышэй размясціліся прадстаўнікі этнічнай групы рома. Трэцюю з канца пазіцыю ў рэйтынгу занялі беларусы. Пра сімпатыю да грамадзян нашай краіны выказаліся 24% апытаных палякаў, а вось 47% ставяцца непрыязна. Перад Беларуссю ў топе размясціліся палестынцы, туркі, індыйцы, габрэі і кітайцы.
Адзначым, што год таму пазіцыі беларусаў у рэйтынгу былі горшыя. Тым разам 51% удзельнікаў апытання выказаў негатыўнае стаўленне да грамадзян нашай краіны і 19% — станоўчае. Падобная сітуацыя і ў расіян. Год таму ім сімпатызавалі 6% удзельнікаў апытання, а 82% выказвалі непрыязнасць. А вось украінцам, наадварот, год таму сімпатызавала больш палякаў (51%) і менш выказвала негатыўнае стаўленне (17%).
