На ўездзе ў Беларусь з боку літоўскага пункта «Мядзінінкай» сабралася значная чарга. Са словаў чытача «Люстэрка», ён стаіць там з вечара аўторка і за больш чым 20 гадзін не змог перасекчы мяжу. Спыталі ў памежнікаў абедзвюх краін, чаму ўзнікла праблема.
Імя суразмоўцы змененае з меркаванняў бяспекі.
Андрэй прыехаў да пункта пропуску «Мядзінінкай» на сваёй машыне ў аўторак, 19 снежня, каля 19.40 паводле літоўскага часу (20.40 паводле беларускага).
— На той момант па гугл-картах да памежнага пункта заставалася каля двух кіламетраў, — расказвае беларус. — Да 23 гадзін мы прасунуліся дзесьці на 200 метраў, а з 23.00 прыкладна да 7.30 наступнага дня руху не было зусім. У суме за 20 гадзін мы праехалі цэлыя 800 метраў. І колькі нам тут яшчэ стаяць? Усё ж у чарзе не толькі мужчыны, ёсць і жанчыны, якім значна важнейшая асабістая гігіена.
На гэты момант (18.00 паводле літоўскага і 19.00 паводле беларускага часу) Андрэй усё яшчэ ў чарзе. Са словаў суразмоўцы, за апошнія некалькі гадзін ён праехаў каля 200 метраў і дагэтуль не даехаў да шлагбаўма.
— Што сітуацыя не вельмі, гэта мякка сказана. Плюс на вуліцы не май месяц, — дзеліцца мужчына.
Што кажуць беларускія і літоўскія памежнікі?
З пытаннем наконт сітуацыі на мяжы журналістка «Люстэрка» патэлефанавала на гарачую лінію Дзяржпамежкамітэта Беларусі як звычайная грамадзянка. Пачуўшы апісанне сітуацыі, там заявілі: з іх боку ўсё ў парадку.
— «Каменны Лог»? У нас перад пунктам пропуску ніводнай машыны няма.
— А тады чаму літоўскі бок не пускае?
— Магу ў вас тое ж пытанне спытаць, чаму літоўцы не пускаюць, — адказаў дзяжурны.
«Люстэрка» таксама звярнулася ў Літоўскую памежную службу. Прэс-служба ведамства заявіла, што «праца памежнага кантролю ў „Мядзінінкаі“ і іншых пунктах памежнага кантролю ідзе ў звычайным рэжыме».
— Прапускная здольнасць легкавых аўтамабіляў знаходзіцца ў межах нормы. Даўжэйшыя чэргі ўтвараюцца з прычыны звычайнага павелічэння трафіку ў перадсвяточны перыяд, калі людзі часцей робяць пакупкі і наведваюць сваякоў, — расказалі там.
Паводле справаздачы пра перасячэнне літоўскай мяжы, якую прэс-служба аддала ў распараджэнне рэдакцыі, паводле звестак на 8 раніцы 19 снежня, у памежным пункце «Мядзінінкай» сапраўды назіралася павелічэнне трафіку. Прапускная здольнасць пункта на выездзе з Літвы для легкавых аўтамабіляў — 245 транспартных сродкаў за суткі. У справаздачы таксама адзначаецца, што на раніцу ўчорашняга дня ў чарзе знаходзілася 160 легкавых машын, а сярэдні час чакання — 8 гадзін.
Чытайце таксама
