У аграгарадку Сеніца Мінскага раёна затрымалі айцішніка Дзмітрыя Маставога, які, паводле сцверджанняў сілавікоў, арганізаваў анлайн-трансляцыю далёкага прывада вайсковага аэрадрома Мачулішчы. Пра гэта расказалі 4 красавіка ў эфіры тэлеканала АНТ.
Далёкі прывад — гэта маяк, які знаходзіцца прыкладна за 4 кіламетры ад створу ўзлётна-пасадачнай паласы аэрадрома. Па АНТ паведамілі, што Дзмітрый Маставы нібыта сам напісаў у бот тэлеграм-канала па маніторынгу ваеннай актыўнасці «Беларускі Гаюн» і прапанаваў сваю дапамогу. Ён расказаў, што вокны яго дома ў Сеніцы выходзяць на далёкі прывад аэрадрома Мачулішчы.
«Магу павесіць вэб-камеру на акно і даць доступ. Альбо павярнуць адну з камер відэаназірання на далёкі прывад і даць доступ. Да далёкага прывада ад дома па прамой 900 метраў», — паказалі на дзяржтэлеканале, як сцвярджаецца, перапіску Маставога з тэлеграм-каналам.
У эфіры АНТ паведамілі, што Маставы наладзіў відэатрансляцыю далёкага прывада з ноўтбука дачкі праз відэазванок у Skype.
«Маставы падключыў ноўтбук дачкі, камера працавала праз Skype, а праграму наладзіў так, што званок прымаўся аўтаматычна, і суразмоўца адразу ж бачыў, што адбываецца на аэрадроме. Два тыдні анлайн — з 26 студзеня да 10 лютага — трансляцыя будзе ісці бесперапынна, суткамі», — расказалі па дзяржТБ.
Паводле версіі сілавікоў, потым айцішнік наладзіў і трансляцыю з камеры відэаназірання, якую ўсталяваў на даху дома.
Затрымалі Маставога 26 лютага па падазрэнні ў садзейнічанні экстрэмісцкай дзейнасці і замаху на дзяржздраду. У эфіры АНТ сцвярджаецца, што яго схапілі ў той момант, калі ён забіраў відэакамеру з хованкі каля АЗС «Газпрамнафта» на 11-м кіламетры трасы М2.
