Учора, 16 сакавіка, турэцкае профільнае выданне AirportHaber паведаміла, што аэрапорты Турцыі перастануць абслугоўваць і запраўляць самалёты з Беларусі і Расіі. Гаворка ідзе пра паветраныя судны, якія ўтрымліваюць больш за 25% амерыканскіх камплектавальнікаў. У выпадку з авіякампаніяй «Белавія» забарона закране самалёты Boeing. Пастанова звязаная з санкцыямі з прычыны вайны ва Украіне. Пагаварылі з супрацоўнікам кампаніі пра тое, як гэта адаб’ецца на рэгулярных і чартарных рэйсах у Турцыю з Беларусі.
У публікацыі AirportHaber гаворыцца, што пад забарону трапілі сем лайнераў «Белавіі», якія ажыццяўлялі рэйсы са Стамбула ў Мінск. Пералічаныя самалёты — вытворчасці амерыканскай карпарацыі Boeing.
Інфармацыю пра тое, што такія санкцыі могуць быць уведзеныя, апублікавала агенцтва Reuters яшчэ 4 лютага гэтага года. Ужо тады пастаўшчык наземных паслуг аэрапорта Турцыі Havas папярэджваў расійскіх і беларускіх авіяперавозчыкаў, што можа спыніць іх абслугоўванне. Havas адправіў ліст незадоўга да сустрэчы афіцыйных асобаў ЗША з прадстаўнікамі турэцкага ўрада і прыватнага сектару (на ёй абмяркоўвалася супрацоўніцтва ў пытанні санкцый супраць Расіі).
AirportHaber паведамляе, што абслугоўванне амерыканскіх самалётаў, якія належаць расійскім і беларускім авіякампаніям, спынілася з 14 сакавіка. Аднак вядома, што рэйсы з Мінска ў Стамбул і назад у апошнія дні ажыццяўляліся па раскладзе. Турцыя — адзін з самых папулярных авіякірункаў з Беларусі. Напрыклад, толькі рэйс B2784 Стамбул — Мінск (які згадваецца ў спісе абмежаванняў) «Белавія» выконвае шэсць разоў на тыдзень.
Адзін з супрацоўнікаў «Белавіі» на ўмовах ананімнасці расказаў «Люстэрку», што тэма абмежавання абслугоўвання ў Турцыі абмяркоўваецца сярод работнікаў, але падрабязных каментароў кіраўніцтва кампаніі пакуль не давала.
— Пад забарону трапляюць як мінімум запраўка самалёта палівам, прыборка, тэхнічнае суправаджэнне, бартавое харчаванне па неабходнасці, — расказаў наш суразмоўца. — Калі забарона не будзе знятая, то гэта моцна ўдарыць па бюджэце «Белавіі». Турцыя — ледзь не галоўны артыкул даходу. Любая авіякампанія добра зарабляе на чартарах, — адзначыў наш суразмоўца.
У расійскай авіякампаніі «Аэрафлот» ужо заявілі, што авіякампанія «выконвае палёты ў гарады Турцыі ў штатным рэжыме, па раскладзе, у рамках заяўленай праграмы палётаў». Паводле інфармацыі расійскіх СМІ, «Аэрафлот» проста замяніў свае Boeing на рэйсах у Турцыю на Airbus 320. Але ці магчымае такое вырашэнне праблемы ў беларускай авіякампаніі?
— Так, акрамя Boeing у нас ёсць самалёты бразільскай кампаніі Embraer. Але гэты борт не разлічаны на такія далёкія адлегласці: пры палёце з Мінска ў Турцыю (а пералёт складае ў сярэднім каля 5 гадзін. — Заўв. рэд.) выпрацуе паліва практычна цалкам. З досведу скажу, што і чатыры гадзіны пералёту для яго шмат. Сэнс гэтага самалёта ў тым, каб з Мінска лётаць у Еўропу працягласцю каля гадзіны, — тлумачыць супрацоўнік «Белавіі». — Тэхнічна пералёт у Турцыю выканаць можна, але з прамежкавай пасадкай для дазапраўкі.
Са словаў нашага суразмоўцы, цяпер няма альтэрнатыўных варыянтаў дабрацца наўпрост з Беларусі ў Турцыю і назад, акрамя як на бартах «Белавіі». Турэцкія авіялініі да нас палёты не выконваюць.
— Сёння палёт выконвае рэйс «Белавія» B2785 з Мінска ў Стамбул. З нецярплівасцю чакаем дэталяў гэтага рэйса, — дзеліцца ён.
Журналістка «Люстэрка» патэлефанавала ў «Белавію» як зацікаўленая грамадзянка, якая плануе найбліжэйшым часам ляцець са Стамбула ў Мінск.
— Убачыла навіну пра спыненне абслугоўвання самалётаў у Турцыі. Нешта змянілася? Ці можна купляць білет?
— Білеты прадаюцца, рэйсы выконваюцца ў штатным рэжыме.
— А калі раптам я куплю білет і нешта зменіцца? Ці вернуць грошы?
— Калі адмяняецца рэйс авіякампаніяй па любым кірунку, то будзе поўнае вяртанне кошту.
