Новы брэнд адзення Lemongrass з’явіўся ў беларускага прадпрыемства «Камволь», паведамляе Citydog. Як піша Marketing.by, стратэгічную платформу маркі, вербальную і візуальную айдэнтыку распрацавала каманда Fabula Branding.
А што тут дзіўнага?
Брэнд Lemongrass належыць ААТ «Камволь» (Мінскі камвольны камбінат), які ўваходзіць у склад дзяржканцэрна «Беллегпрам». Гэта адзін з «флагманаў лёгкай прамысловасці», як любяць называць камбінат у дзяржСМІ: ён выпускае гарнітурныя і плаццевыя тканіны, паўшарсцяную, трыкатажную і ткацкую пражу.
А акрамя таго, ААТ «Камволь» — адно з самых праблемных прадпрыемстваў беларускай лёгкай прамысловасці, якое дзяржава спрабуе рэанімаваць ужо не першы год. Пачынаючы з 2000-х колькасць работнікаў знізілася ў 7 разоў, аб’ёмы вытворчасці ўпалі, а прадпрыемствы, якія ўваходзяць у склад камбіната, у судовым парадку абвяшчалі неплацежаздольнымі.
У 2012 годзе Лукашэнка распарадзіўся ўкласці ў яго мадэрнізацыю сур’ёзныя сродкі. 110 мільёнаў даляраў за 5 гадоў — менавіта столькі было ўкладзена ў поўны апгрэйд камбіната. Але і гэта не асабліва дапамагло. Камбінат зрабіў стаўку на ўгоды з турэцкімі партнёрамі, у выніку чаго была рэалізаваная толькі частка прадукцыі, астатняе засталося незапатрабаваным на складах. У 2019 годзе скончылася адтэрміноўка па выплаце доўгу крэдыторам, і прадпрыемства звалілася ў яшчэ большыя даўгі.
У 2022 годзе пасля пачатку вайны ва Украіне ААТ «Камволь» страціла яшчэ адзін рынак збыту. Паводле словаў гендырэктара Максіма Малашчыцкага, Украіна давала прадпрыемству каля 20 адсоткаў прыбытку. У грашовым выражэнні гэта каля 3 мільёнаў даляраў.
Як кажа Малашчыцкі, уласны брэнд адзення Lemongrass пачалі развіваць акурат на фоне сыходу заходніх вытворцаў з расійскага рынку: «І мы гатовыя іх замясціць».
Дык што за брэнд у выніку
Вербальную і візуальную айдэнтыку брэнда распрацавала каманда Fabula Branding — беларускае агенцтва, якое працавала над візуалам для многіх мясцовых і замежных кампаній. Напрыклад, яны распрацавалі дызайн упакоўкі першых і адзіных беларускіх прэзерватываў, а ў 2018 годзе атрымалі прэстыжную міжнародную ўзнагароду за брэнд упакоўкі бульбы «Бабіна лета».
«Lemongrass — тры склады, якія ствараюць рытміку, што паляпшае запамінальнасць назвы і робіць яе прыемным для слыхавога ўспрымання. У гэтым яркім і „духмяным“ імені ўвасабляецца колеравая палітра брэнда, звязаная са словамі lemon і grass — сакавіты жоўты і глыбокі зялёны», — каментуе працу агенцтва.
Пад гандлёвай маркай Lemongrass ААТ «Камволь» выпускае мужчынскія касцюмы сілуэту slim fit, а таксама асобна штаны і пінжакі. Ёсць на сайце, дарэчы, і жаночая калекцыя.
Чытайце таксама на Citydog:
Теперь министрам можно будет писать в чат-бот. Обещают быть на связи 24/7
12 лет колонии: вынесен первый приговор заочного суда над уехавшими белорусами
Пилон или качели? Эта секси-квартира сдается всего за 54 доллара/сутки — и можно все