Галоўным лаўрэатам прэміі Ежы Гедройця стаў беларускі пісьменнік, гісторык і журналіст Сяргей Абламейка з кнігай «Невядомы Менск. Гісторыя знікнення. Кніга першая», выдадзенай у мінулым годзе. Пра гэта стала вядома падчас трансляцыі 17 кастрычніка на YouTube-канале ПЭН-цэнтра.
«Невядомы Менск. Гісторыя знікнення» — гэта першае навуковае даследаванне пра час і прычыны разбурэння Старога гораду — аднаго з самых каштоўных раёнаў гістарычнага Менска. У кнізе распавядаеццца пра тое, як паўтара дзясятка вуліц і завулкаў, шчыльна забудаваных мураванымі дамамі XVII-XIX стагоддзяў, што існавалі на Замкавай гары і яе ваколіцах, зніклі без следу.
Кніга была выдадзена ў 2021 годзе ў серыі «Бібліятэка Свабоды».
— Гэта кніжка пра найвялікшую мару майго жыцця: я б вельмі хацеў убачыць калі-небудзь адноўленую забудову Замкавай гары і Нізкага рынку. І вельмі важна, каб людзі падзялілі гэтую думку, — распавёў на цырымоніі ўручэння прэміі Сяргей Абламейка.
Як паведамляе «Новы Час», пераможца атрымае грашовую прэмію.
Другое месца заняла Вольга Гапеева за кнігу «Самота, што жыла ў пакоі насупраць» (Минск, «Галіяфы», 2021). У якасці прыза яна зможа здзейсніць творчую паездку на Готланд (Швецыя).
Трэцім лаўрэатам прэміі з магчымасцю выдаць наступную кнігу стаў Валеры Гапееў («Жэнька, каралева мышак». Мінск, «Кнігазбор», 2021).
Акрамя таго, у шорт-ліст прэміі ўвайшлі яшчэ тры беларускіх аўтара і іх творы:
- Максім Клімковіч, «Шкляная лялька і іншыя страшныя гісторыі» (Мінск, «Галіяфы», 2021)
- Уладзімір Някляеў, «Гэй Бэн Гіном» (Беласток, Фонд Kamunikat.org, 2021)
- Ганна Севярынец, «Мая школа» (Мінск, «Лімарыус», 2021)
Летась прэмію імя Ежы Гедройця атрымала Ева Вежнавец за кнігу «Па што ідзеш, воўча?»
У склад журы сёлета ўваходзілі літаратуразнаўца Ўльяна Верына; крытык, літаратар Сяргей Дубавец; пісьменніца Ева Вежнавец; паэт, перакладчык Андрэй Хадановіч; крытык, літаратуразнаўца Ціхан Чарнякевіч.
Прэмія Гедройця — найбуйнейшая незалежная літаратурная прэмія Беларусі, якая ўручаецца штогод з 2012 года за найлепшую кнігу прозы, што выйшла ў папярэднім годзе на беларускай мове. Прэмія была названа ў гонар ураджэнца Мінска, польскага публіцыста і палітыка Ежы Гедройця, які выступаў за добрасуседскія зносіны паміж Польшчай і Беларуссю.
Арганізатарамі прэміі з’яўляюцца Беларускі ПЭН-цэнтр і Міжнародны саюз беларускіх пісьменнікаў. Яе партнёр — Цэнтр даследаванняў Усходняй Еўропы Варшаўскага універсітэта.