Былая прэс-сакратарка МУС Вольга Чамаданава 30 кастрычніка падала ў Цэнтрвыбаркам дакументы на рэгістрацыю сваёй ініцыятыўнай групы на прэзідэнцкіх выбарах 2025 года, паведаміў тэлеграм-канал ЦВК.
Прэс-сакратаркай МУС Вольга Чамаданава стала ў канцы снежня 2018 года. Да гэтага яна больш за 12 гадоў узначальвала інспекцыю па справах няпоўнагадовых УУС Мінскага райвыканкама.
Адным з самых вядомых эпізодаў працы Чамаданавай стала публікацыя ілжывай інфармацыі пра першага загінулага падчас пратэстаў — Аляксандра Тарайкоўскага. Позна ўвечары 10 жніўня 2020 года ў тэлеграм-канале МУС з’явілася паведамленне, у якім сцвярджалася, што адзін з пратэстоўцаў спрабаваў кінуць у бок сілавікоў нявысветленую выбуховую прыладу — і загінуў, калі яна выбухнула ў яго ў руцэ.
Але ўжо ў хуткім часе грамадскасці сталі даступныя шматлікія фота- і відэаматэрыялы, якія аспрэчвалі афіцыйную версію. На здымках было відаць, што Тарайкоўскі падыходзіў да шэрагаў спецназаўцаў з пустымі рукамі, больш за тое — яны былі дэманстратыўна паднятыя ўверх. Таксама ў роліках відаць стрэлы сілавікоў, пасля якіх на белай футболцы Аляксандра з’яўляецца кроў, а ён потым падае на асфальт.
Паведамленне дагэтуль не выдаленае з канала МУС, ведамства таксама не прыносіла прабачэнняў з гэтай нагоды, хоць сама інфармацыя была абвергнутая ў тым ліку і афіцыйнымі асобамі. Яшчэ 16 жніўня тагачасны кіраўнік МУС і непасрэдны начальнік Чамаданавай Юрый Караеў у сваім каментары TUT.BY дапусціў, што прычынай смерці Тарайкоўскага мог быць стрэл «з несмяротнай зброі».
У кастрычніку 2021 года Чамаданава пакінула пасаду прэс-сакратаркі і ўзначаліла Галоўнае ўпраўленне ідэалагічнай работы і па справах моладзі Мінгарвыканкама. Яе месца ў МУС заняла былая прэс-сакратарка УУС Брэсцкага аблвыканкама Наталля Сахарчук.
Нагадаем, прэзідэнцкія выбары прызначаныя ў Беларусі на 26 студзеня 2025 года. 26 кастрычніка ЦВК прыняў дакументы на рэгістрацыю ініцыятыўнай групы па вылучэнні кандыдатам у прэзідэнты Аляксандра Лукашэнкі. Дакументы на рэгістрацыю яшчэ двух кандыдатаў — старшыні руху «За Свабоду» і эксперта па рэгіянальным развіцці Народнага антыкрызіснага ўпраўлення Юрася Губарэвіча і Аляксандра Драздова — адхілілі.
30 кастрычніка ў Цэнтрвыбаркам былі пададзеныя дакументы на рэгістрацыю ініцыятыўных груп па вылучэнні кандыдатамі ў прэзідэнты лідара Ліберальна-дэмакратычнай партыі Беларусі Алега Гайдукевіча і кіраўніка Рэспубліканскай партыі працы і справядлівасці Аляксандра Хіжняка.