Канфлікт паміж былымі сілавікамі пасля расколу BYPOL і ўтварэння BELPOL не сціхае. У нядзелю, 3 снежня, прадстаўнік BYPOL Станіслаў Лупаносаў абвінаваціў свайго былога калегу па арганізацыі Мацвея Купрэйчыка ў крадзяжы часткі ахвяраванняў на план «Перамога» — 191 тысячы даляраў. Відэа пра гэта было апублікованае на YouTube-канале арганізацыі.
Лупаносаў нагадаў, што канфлікт у арганізацыі пачаўся ў чэрвені гэтага года, калі Купрэйчык і яшчэ некалькі ўдзельнікаў ініцыятывы адмовіліся прайсці праверку на дэтэктары хлусні і былі звольненыя ў сувязі са «стратай даверу». Паводле Лупаносава, яшчэ задоўга да тых падзей у адрас Купрэйчыка ўзніклі падазрэнні што да фінансавай добрасумленнасці.
Менавіта Купрэйчык, паводле прадстаўніка BYPOL, адказваў у арганізацыі за фінансы, на яго імя яшчэ пры ўзнікненні ініцыятывы ў 2021 годзе былі зарэгістраваныя электронныя кашалькі, на якія паступалі ахвяраванні. У тым ліку на план «Перамога». Іншым чальцам BYPOL доступу да кашалькоў не давалі з меркаванняў бяспекі, усё гэта не было праблемай, пакуль паміж удзельнікамі быў давер.
Лупаносаў сцвярджае, што, пайшоўшы з BYPOL, Купрэйчык пакінуў за сабой не толькі ўсе медыярэсурсы, але і тыя самыя кашалькі арганізацыі з усімі грашыма, якія «прызначаліся для беларускіх партызан».
Акрамя таго, кажа прадстаўнік BYPOL, Купрэйчык атрымліваў і наяўныя сродкі ад донараў на развіццё арганізацыі. У прыватнасці, яму нібыта перадавалі наяўныя грошы ў Вільнюсе, пра што Купрэйчык кіраўніцтву BYPOL не паведаміў.
Станіслаў Лупаносаў заявіў, што пасля звальнення Купрэйчыка BYPOL правёў фінансавае расследаванне і знайшоў пераводы, пра якія раней не было вядома, і вывад з рахункаў немалога аб’ёму грошай — 191 тысячы даляраў.
«Грошы, якія мусілі пайсці на куплю абсталявання для беларускіх партызан, былі скрадзеныя», — гаворыцца ў відэа. Гэтыя сродкі Купрэйчык нібыта выдаткаваў на асабістыя патрэбы.
Цяпер BYPOL, як запэўніў Лупаносаў, рыхтуе зварот у польскі суд па гэтых фактах.
Тым часам у BELPOL кажуць, што ўсё гэта няпраўда.
«Аб'яднанне сілавікоў дэмакратычнай Беларусі BELPOL заяўляе, што звесткі, якія распаўсюджваюцца прадстаўнікамі фонду BYPOL, пра нібыта дачыненне нашых супрацоўнікаў да крадзяжу данатаў беларусаў — абсалютная хлусня. Далейшае разбіральніцтва па гэтым пытанні будзе праводзіцца ў юрыдычнай плоскасці ў адпаведнасці з нормамі заканадаўства», — такі каментар атрымала «Люстэрка» ад Мацвея Купрэйчыка.
Менш стрымана выказаўся прэс-сакратар BELPOL Аляксандр Кабанаў, у якога рэдакцыя прасіла афіцыйны каментар ад імені арганізацыі.
«Усе напісаныя і агучаныя заявы прыватнага фонду [Аляксандра] Азарава будуць разгледжаныя ў судовым парадку ў адпаведнасці з заканадаўчымі нормамі краіны знаходжання. Больш гэты паклёп мы каментаваць не будзем, бо ў нашай арганізацыі іншыя мэты і задачы, у адрозненне ад сканцэнтраванай на ўнутранай барацьбе кампашкі Азарава», — заявіў прадстаўнік BELPOL.