Прэс-сакратар Аляксандра Лукашэнкі Наталля Эйсмант заявіла, што Віктар Лукашэнка курыруе развіццё адносін з ААЭ. Пра гэта яна расказала ў інтэрв'ю БЕЛТА.
«У кожнай краіны, зноў жа, свае асаблівасці, у тым ліку ў выбудоўванні дыпламатычнага супрацоўніцтва. Вядома, для краін арабскага свету гэта вельмі асаблівы статус, асаблівы ўзровень даверу, калі адносіны курыруе хтосьці з сям'і лідара, кіраўніка дзяржавы. Асабліва калі гэта сын ці старэйшы сын, то гэта першапачаткова задае зусім іншы характар супрацоўніцтва. Гэта максімальна падымае планку», — патлумачыла яна.
Паводле яе словаў, рашэнне, што супрацоўніцтва з ААЭ будзе курыраваць старэйшы сын, было прынятае Аляксандрам Лукашэнкам, калі Віктар Лукашэнка займаў пасаду памочніка прэзідэнта па нацыянальнай бяспецы.
Пасля змены дзейнасці было прынятае рашэнне нічога не мяняць у схеме выбудоўвання адносін з ААЭ.
«І тут не трэба нічога мяняць. Таму што, паўтаруся, гэта вельмі важны момант менавіта для таго рэгіёна. Каб сапраўды абсалютна давераная асоба курыравала гэтыя адносіны. Калі прыязджае з візітам выбудоўваць адносіны, размаўляць цалкам канкрэтна па любых напрамках, эканамічных у першую чаргу, сын кіраўніка дзяржавы, у іх поўны давер да таго, што гаворыць беларуская дэлегацыя. У гэтым ёсць спецыфіка нашага супрацоўніцтва з гэтым рэгіёнам», — сказала прэс-сакратар Лукашэнкі.
Нагадаем, 2 лютага прэс-служба Лукашэнкі апублікавала фатаграфіі з сустрэчы з прэзідэнтам ААЭ Мухамедам бін Заідам аль-Нахаянам. На здымках быў і Віктар Лукашэнка, які, нагадаем, цяпер займае пасаду прэзідэнта Нацыянальнага алімпійскага камітэта.