Вярхоўная Рада Украіны 16 лістапада прагаласавала за спыненне дзеяння пагаднення з Беларуссю аб пазбяганні двайнога падаткаабкладання. За скасаванне дамовы, якая дзейнічала з 1994 года, выступілі 304 дэпутаты, паведаміў першы намеснік падатковага камітэта Вярхоўнай Рады Яраслаў Жалязняк.
У тлумачальнай запісцы Вярхоўнай Рады гаворыцца, што гэта зроблена для «паскарэння тэмпаў дэактывацыі эканамічных і фінансавых сувязяў з краінай-агрэсарам і яе саюзнікамі».
Пасля спынення дзеяння пагаднення да ўсіх даходаў рэзідэнтаў Беларусі на тэрыторыі Украіны будзе прымяняцца агульная, а не льготная стаўка. Для ўсіх даходаў беларускіх кампаній і фізічных асобаў, якія яны атрымліваюць ва Украіне, яна складзе 15% замест раней прадугледжаных пагадненнем 10%.
У сваю чаргу рэзідэнты Украіны, якія і далей будуць працаваць у нашай краіне, будуць плаціць падаткі і ва ўкраінскі, і ў беларускі бюджэт.
Акрамя таго, Украіна вызваляецца ад абавязання што да абмену інфармацыяй па падатковых пытаннях з беларускімі органамі.
Закон павінен уступіць у сілу на наступны дзень пасля яго апублікавання.