Расійскі вайсковы самалёт выпусціў паўтонную бомбу на Белгародскую вобласць. Да Украіны снараду заставалася ляцець больш за 60 км, піша тэлеграм-канал ASTRA.
Паводле звестак тэлеграм-канала, інцыдэнт адбыўся 4 траўня — з расійскага самалёта, які пралятаў над Белгародскай вобласцю, «няштатна сышла» авіябомба. Яна звалілася за 2 кіламетры ад вёскі Івіца ў Карачанскім раёне — гэта больш за 60 км па простай лініі ад мяжы з Украінай.
Паводле звестак крыніц, ФАБ-500 ужо перавезлі на палігон для знішчэння.
Пацярпелых і пашкоджанняў удалося пазбегнуць.
Раней ASTRA паведамляла пра «няштатнае» бамбаванне вёскі Цыбулёўка 9 красавіка, у выніку якога былі пашкоджаныя восем дамоў. За дзень да гэтага, 8 красавіка, авіябомба ФАБ звалілася перад машынай 36-гадовага жыхара Белгародскай вобласці, ён атрымаў множныя аскепкавыя раненні. У абодвух выпадках у тым, што адбылося, абвінавацілі УСУ.
Усяго, паводле звестак ASTRA, як мінімум 70 авіябомбаў (62 ФАБ і 7 УМПБ) і тры ракеты «выпусцілі» расійскія самалёты ў Расіі і на акупаваных тэрыторыях Украіны з пачатку 2025 года.
Як раней расказвала ASTRA, для процідзеяння ўкраінскай СПА расійская армія пачала абсталёўваць савецкія авіябомбы ФАБ комплексамі УМПК (уніфікаваны модуль планавання і карэкцыі). Пасля такога абнаўлення на ФАБах з’яўляюцца крылы і спадарожнікавае навядзенне, якія дазваляюць запускаць бомбы проста з тэрыторыі РФ. Але праз недасканаласць сістэмы авіябомбы не заўсёды далятаюць да цэляў і падаюць на расійскія тэрыторыі. Улады РФ такія факты спрабуюць утойваць.