Відэа з Віцебска, дзе на аўтобусным прыпынку хлопец займаецца сэксам з дзяўчынай, разляцелася па сацсетках. Кадры вывучыла міліцыя і знайшла аднаго з парушальнікаў. Пра гэта паведаміў неафіцыйны тэлеграм-канал МУС.
Затрыманы — 25-гадовы жыхар Віцебска.
«У той вечар хлопец распіваў спіртное дома і паралельна перапісваўся з сяброўкай з Оршы. Павышаючы градус у арганізме, малады чалавек павышаў яго і ў перапісцы. Урэшце дама не вытрымала напору і паклікала кавалера ў госці для асабістых зносін», — гаворыцца ў паведамленні.
Хлопец хацеў паехаць на спатканне на маршрутцы, але кіроўца адмовіўся браць нецвярозага пасажыра. На тым жа прыпынку знаходзілася нецвярозая дзяўчына, якая таксама не змагла сесці ў маршрутку. Хлопец прапанаваў ёй сваю дапамогу. Ён вырашыў ехаць у Оршу на таксі і паабяцаў новай знаёмай, што і яе падкіне куды ёй трэба.
У чаканні аўтамабіля маладыя людзі заняліся сэксам проста на прыпынку.
«За гэтым заняткам іх і знялі выпадковыя сведкі», — гаворыцца ў паведамленні.
Віцябляніна ў выніку знайшлі і затрымалі, у дачыненні да яго распачалі крымінальную справу за хуліганства. Асобу дзяўчыны высвятляюць.