Падаткавікі працягваюць шукаць наймальнікаў, якія выплачваюць заробкі ў канвертах. «Гэта і сацыяльнае пытанне, якое ўплывае на абарону нашых грамадзян, гэта ў тым ліку і пенсіі», — заявіў намеснік міністра па падатках і зборах Уладзімір Муквіч. Нагадаем, у Беларусі хочуць увесці асаблівы парадак выплаты ўнёскаў у Фонд сацыяльнай абароны насельніцтва для заробкаў у канвертах.
Як паведаміў Уладзімір Муквіч, у першым квартале гэтага года падаткавікі «правялі шэраг кантрольных мерапрыемстваў» па заробках у канвертах і скіравалі больш за 22 тысячы паведамленняў і апавяшчэнняў «у рамках прафілактыкі і камеральнага кантролю».
Паводле звестак МПЗ, за гэты перыяд тым, хто выплачваў заробкі ў канверце, даналічаны падаходны падатак больш чым на 14 млн рублёў.
Нагадаем, чыноўнікі таксама хочуць увесці асаблівы парадак выплаты ўнёскаў у ФСАН для заробкаў у канвертах, калі іх выявяць у кагосьці з наймальнікаў. Адно з магчымых новаўвядзенняў — адмена абмежавання, паводле якога на такія заробкі могуць выстаўляць унёскі не больш чым з пяці сярэдніх па краіне. Замест гэтага за аснову хочуць браць фактычны заробак чалавека, а таксама ўвесці мінімальную планку па такіх налічэннях.
«Для работнікаў, якія атрымліваюць заробак у канвертах, у страхавы стаж для пенсіі будуць улічвацца выплаты з памеру мінімальнай заработнай платы, — адзначалі раней у парламенце. — Органы ФСАН нароўні з падатковымі органамі надзяляюцца правам вынясення самастойных рашэнняў пра спагнанне пазычанасці суб’ектаў гаспадарання ў парадку, прадугледжаным заканадаўствам пра выканаўчую вытворчаць».
Чытайце таксама
