Кіеў адклікае амбасадара Украіны ў Беларусі. І гаворка нават не пра вайну

19 красавiка 2023 у 1681875540
«Зеркало»

МЗС Украіны асуджае правядзенне 18 красавіка ў Мінску сустрэчы Аляксандра Лукашэнкі з Дзянісам Пушыліным і расцэньвае гэта як спробу легітымізацыі расійскай акупацыйнай адміністрацыі ў Данецку. Пра гэта паведамляецца на сайце ўкраінскага ведамства.

«Лічым сустрэчу з прадстаўніком расійскай акупацыйнай адміністрацыі, які хаваецца ад украінскага следства за ўчыненне цяжкіх злачынстваў і знаходзіцца пад украінскімі і міжнароднымі санкцыямі, чарговым і абуральным недружалюбным актам з боку Рэспублікі Беларусь, скіраваным на падтрымку дзяржавы-агрэсара РФ», - адзначаюць у МЗС.

У сувязі з гэтым МЗС Украіны прыняў рашэнне выклікаць амбасадара Украіны ў Беларусі Ігара Кізіма для кансультацый.

У дыпламатычным ведамстве дадалі, што Мінск мусіць устрымлівацца ад такіх дэструктыўных крокаў і спыніць падтрымку вайны Расіі супраць Украіны.

Нагадаем, 18 красавіка адбылася сустрэча Аляксандра Лукашэнкі з «часовым выканаўцам абавязкаў кіраўніка» самаабвешчанай ДНР Дзянісам Пушыліным. Падчас яе Лукашэнка пацікавіўся: «На фронце як у нас там справы?»

Паводле словаў Пушыліна, яго з афіцыйным візітам у Беларусь запрасіў сам Лукашэнка.

Аляксандр Лукашэнка дагэтуль не прызнаў на афіцыйным узроўні самаабвешчаныя ЛДНР.