Гамяльчанка пяць гадоў здымала на продаж порна з сынам і дачкой, муж пра гэта не ведаў. Дзяцей палохала адбіраннем тэлефонаў і грошай

Гамяльчанка пяць гадоў здымала парнаграфічныя ролікі з удзелам сваіх дзяцей дзеля заробку ў інтэрнэце і здабыла на гэтым дзясяткі тысяч рублёў, расказаў «Гомельскім ведамасцям» начальнік першага следчага аддзялення Гомельскага гарадскога аддзела Следчага камітэта Віктар Сецкі. Дзяцей жанчына запалохвала, а муж быў не ў курсе яе дзейнасці.

Пяць гадоў 36-гадовая маці прымушала сына і дачку ўдзельнічаць у парнаграфічных сесіях для замежнікаў, піша выданне. За гэты час на продажы порна яна зарабіла звыш 47 тысяч рублёў. Фота і відэа ад яе атрымлівалі больш чым 300 кліентаў у розных краінах. Жанчына пайшла на злачынства, даведаўшыся, што пікантныя сцэны з дзецьмі аплачваюцца ўтрая даражэй.

«Было высветлена, што жыхарка Гомеля з 2018-га да 2023 года на розных сайтах знаёмілася з мужчынамі не толькі з Беларусі, але і з розных краін, актыўна перапісвалася з імі ў месэнджарах і ў сацсетцы „ВКонтакте“, за ўзнагароджанне здымаючы і перасылаючы ім фота і відэа парнаграфічнага зместу, у далейшым — з удзелам сваіх дзяцей», — расказаў следчы.

Жанчына ў тым ліку праводзіла анлайн-трансляцыі.

«Бацька не ведаў пра гэтую злачынную дзейнасць маці, якая ўсяляк запалохвала дзяцей, калі яны адмаўляліся дапамагаць ёй у такім зараблянні. Жанчына пагражала, што яны застануцца без грошай, што пазбавяцца мабільных тэлефонаў і не пойдуць гуляць. Часам маці не размаўляла з дзецьмі некалькі дзён», — паведаміў Сецкі.

У выніку гамяльчанку абвінавацілі па пяці артыкулах КК:

• ч. 1 арт. 169 (Распусныя дзеянні ў дачыненні да асобы, якая не дасягнула шаснаццацігадовага ўзросту);
• ч. 3 арт. 343−1 (Выкарыстанне заведама малагадовага для вырабу парнаграфічных матэрыялаў з яго выявай);
• ч. 3 арт. 167 (Іншыя дзеянні сэксуальнага характару, учыненыя насуперак волі пацярпелага, з пагрозай прымянення гвалту, з выкарыстаннем бездапаможнага стану пацярпелага, учыненыя ў дачыненні да заведама малагадовага, у тым ліку паўторна);
• ч. 2 арт. 343 (Выраб з мэтай распаўсюду парнаграфічных матэрыялаў);
• ч. 2 арт. 343 (Выраб і захоўванне з мэтай распаўсюду, распаўсюд парнаграфічных матэрыялаў, учыненыя з карыслівых меркаванняў).

Абвінавачаная знаходзіцца пад вартай. Крымінальная справа перададзеная пракурору Гомеля для скіравання ў суд.